SOMO 1: 1Sam.1:24-28
Siku zile, Hana alimchukua pamoja naye, na ng'ombe wa miaka mitatu, na efa moja ya unga, na chupa ya divai, akamleta nyumbani kwa BWANA, huko Shilo; na Yule mtoto alikuwa mtoto mdogo. Nao wakamchinja huyo ng'ombe, wakamleta mtoto kwa Eli. Akasema, Ee bwana wangu, kama iishivyo roho yako, bwana wangu, mimi ndimi yule mwanamke aliyesimama karibu nawe hapa, nikimwomba Bwana. Naliomba nipewe mtoto huyu; Bwana akanipa dua yangu niliyomwomba; kwa sababu hiyo mimi nami nimempa Bwana mtoto huyu; wakati wote atakaokuwa hai amepewa Bwana. Naye akamwabudu Bwana huko.

WIMBO WA KATIKATI: 1Sam.2:1,4-8
1. Naye Hana akaomba, akasema, Moyo wangu wamshangilia Bwana,
Pembe yangu imetukuka katika Bwana,
Kinywa changu kimepanuka juu ya adui zangu;
Kwa kuwa naufurahia wokovu wako; (K)

(K) Moyo wangu wamshangilia Bwana mwokozi wangu.

2. Pinde zao mashujaa zimevunjika,
Na hao waliojikwaa wamefungiwa nguvu.
Walioshiba wamejikodisha ili kupata chakula,
Na hao waliokuwa na njaa wamepata raha.
Naam, huyo aliyekua tasa amezaa watoto saba,
Na yeye aliye na wana wengi amedhoofika. (K)

3. Bwana huua, naye hufanya kuwa hai;
Hushusha hata kuzimu, tena huleta juu.
Bwana hufukarisha mtu, naye hutajirisha;
Hushusha chini, tena huinua juu. (K)

4. Humwinua mnyonge kutoka mavumbini,
Humpandisha mhitaji kutoka jaani,
Ili awaketishe pamoja na wakuu,
Wakakirithi kiti cha enzi cha utukufu;
Kwa maana nguzo za dunia zina Bwana,
Naye ameuweka ulimwengu juu yake. (K)

Shangilio
Aleluya, aleluya,
Ee Mfalme wa mataifa na jiwe la msingi wa Kanisa
uje kumwokoa mwanadamu aliyemuumba kwa udongo.
Aleluya.

INJILI: Lk.1:46-56
Siku ile Mariamu alisema,
Moyo wangu wamwadhimisha Bwana,
Na roho yangu imemfurahia Mungu, Mwokozi wangu;
Kwa kuwa ameutazama Unyonge wa mjakazi wake.
Kwa maana, tazama, tokea sasa Vizazi vyote wataniita mbarikiwa;
Kwa kuwa Mwenye nguvu amenitendea makuu, Na jina lake ni takatifu.
Na rehema zake hudumu vizazi hata vizazi, Kwa hao wanaomcha.
Amefanya nguvu kwa mkono wake;
Amewatawanya walio na kiburi katika mawazo ya mioyo yao;
Amewaangusha wakuu katika viti vyao vya enzi;
Na wanyonge amewakweza.
Wenye njaa amewashibisha mema, Na wenye mali amewaondoa mikono mitupu.
Amemsaidia Israeli, mtumishi wake; Ili kukumbuka rehema zake;
Kama alivyowaambia baba zetu, Ibrahimu na uzao wake hata milele.
Mariamu akakaa naye kadiri ya miezi mitatu, kisha akarudi kwenda nyumbani kwake.

------------

NOVENA YA NOELI
Kama inasaliwa hufuata mara baada ya Injili, na huchukua sehemu ya sala za waamini

• Novena

  NOVENA Des. 22 P:- Furahi ee Binti Sioni, na shangilia ee Binti Yerusalemu: sikia Bwana atafika na siku ile utatokea mwanga mkuu, na milima itatonesha utamu; na vilima vitatiririsha maziwa na asali, kwa sababu atafika nabii mkuu, na yeye atageuza Yerusalemu W: Bwana yu karibu, njoni tumwabudu. K: - Sasa Mungu-Mtu wa nyumba ya Daudi atakuja kuketi juu ya kiti cha enzi; mtamwona na moyo wenu utafurahi. W: Bwana yu karibu, njoni tumwabudu. K:- Sikia, atafika Bwana na Mlinzi wetu, Mtakatifu wa Israeli. Kichwani mwake ana taji la ufamle wake: atatawala nchi toka bahari hata bahari, toka mto hata ukingoni mwa dunia. W: Bwana yu karibu, njoni tumwabudu. K:- Sikia Bwana atakuja, hadanganyi; hata akikawia mngoje kwani atafika tu, hawezi kuchelewa. W: Bwana yu karibu, njoni tumwabudu. K:- Bwana atashuka kama mvua juu ya ngozi yenye manyoya: katika siku zake kutakuwa na haki na amani tele; na wafalme wote wa dunia watamwabudu na makabila yote yatamtumikia. W: Bwana yu karibu, njoni tumwabudu. K:- Mtoto atazaliwa kwa ajili yetu na ataitwa Mungu mwenye nguvu; atakalia kiti cha enzi cha Daudi baba yake; atatawala na begani atachukua fimbo ya uwezo wake. W: Bwana yu karibu, njoni tumwabudu. K:- Ee Bethlehemu Mji wa Mungu Mkuu, kwako atatokea mtawala wa Israeli: na uzao wake ni wa milele, atatukuzwa katika dunia yote; na atakapofika, kutakuwa amani humu duniani mwetu. W: Bwana yu karibu, njoni tumwabudu. P: Ee Bwana twakusihi uharakishe wala usichelewe na utuletee nguvu ya juu, kusudi wote wanaotumainia huruma yako wapate kufarijiwa na majilio yako. Unayeishi na kutawala daima na milele. Amina. -------------------------- Baada ya kukominika [badala ya wimbo wa Shukurani], huimbwa Antifona na kisha wimbo wa Bikira Maria [Maginificat] ANT: Ee Mfalme wa mataifa na matumaini yao, jiwe la pembe, unayeunganisha maagano mawili, uje umkomboe mtu uliyemtengeneza kwa udongo. WIMBO WA BIKIRA MARIA Lk.1:46-55 Roho yangu inamfurahia Bwana Moyo wangu wamtukuza Bwana,/ Roho yangu inafurahi* kwa sababu ya Mungu Mwokozi wangu. Kwa kuwa amemwangalia kwa huruma/ mtumishi wake mdogo,* hivyo tangu sasa watu wote wataniita mwenye heri. Kwa kuwa Mwenyezi Mungu amenitendea makuu,* jina lake ni takatifu. Huruma yake kwa watu wanaomcha* hudumu kizazi hata kizazi. Amefanya mambo makuu kwa mkono wake:* amewatawanya wenye kiburi katika mawazo ya mioyo yao; amewashusha wenye vyeo kutoka viti vyao vya enzi,* akawakweza wanyeyekevu. Wenye njaa amewashibisha mema,* matajiri amewaacha waende mikono mitupu. Amempokea Israeli mtumishi wake,* akikumbuka huruma yake, kama alivyowaahidia wazee wetu,* Abrahamu na uzao wake hata milele. Atukuzwe Baba na Mwana* na Roho Mtakatifu. Kama mwanzo na sasa na siku zote* na milele. Amina ANT: Ee Mfalme wa mataifa na matumaini yao, jiwe la pembe, unayeunganisha maagano mawili, uje umkomboe mtu uliyemtengeneza kwa udongo. -------------- Baada ya wimbo wa Bikira Maria, na antifona yake kisha isaliwe sala baada ya Komunyo na kisha Baraka.

MAOMBI
Ndugu, Mkombozi wetu atakayekuja ni matunda ya huruma ya Mungu kufuatia kilio chetu tangu enzi za babu zetu. Kwa kuwa sasa anazidi kukaribia, tuombe:

Kiitikio: Pokea ombi letu.
1. Kila mmoja wetu ajiandae kikamilifu na apewe ujasiri wa kukutana naye na kujitoa kwake kabisa.

2. Kwa kuwa kila tulicho nacho kimetoka kwako, utupe moyo wa kutoa chochote tulicho nacho kwa ajili yako na Kanisa lako Takatifu.

3. Ee Mungu Baba, rehema zako zadumu kizazi hata kizazi kwa wachaji wako. Uwakweze wanyonge, uwashibishe wenye njaa na utupe moyo wa kuhurumiana na kusadiana sisi kwa sisi.

4. Tunawaombea marehemu wetu F. ili wapokelewe huko aliko Mkombozi wetu.

Ee Baba mwema, Mwanao alivisikiliza vilio vya wengi: akina mama tasa, wajane na wengineo; kisha akawaonea huruma kwa kuwasaidia kadiri ya maombi yao. Kwa huruma yako, upokee maombi yetu tunayokutolea. Kwa njia ya huyo Kristo Bwana wetu. Amina.