SOMO 1: Kol.3:1-11
Mkiwa mmefufunuliwa pamoja na Kristo yatafuteni yaliyo juu, Kristo aliko, ameketi mkono wa kuume wa Mungu. Yafikirini yaliyo juu, siyo yaliyo katika nchi. Kwa maana mlikufa, na uhai wenu umefichwa pamoja na Kristo katika Mungu. Kristo atakapofunuliwa, aliye uhai wetu, ndipo na ninyi mtafunuliwa pamoja naye katika utukufu. Basi, vifisheni viungo vyenu vilivyo katika nchi, uasherati, uchafu, tamaa mbaya, mawazo mabaya, na kutamani, ndiyo ibada ya sanamu; kwa ajili ya mambo hayo huja ghadhabu ya Mungu. Katika hayo ninyi nanyi mlitembea zamani, mlipoishi katika hayo. Lakini sasa yawekeni mbali nanyi haya haya yote, hasira, na ghadhabu, na uovu, na matukano, na matusi vinywani mwenu. Msiambiane uongo, kw akuwa mmevua kabisa utu wa kale, pamoja na matendo yake; mkivaa utu mpya, unaofanywa upya upate upafamu sawasawa na mfano wake yeye aliuumba. Hapo hapana Myunani wala Myahudi, kutahiriwa wala kutokutahiriwa, mgeni wala mshenzi mtumwa wala mwungwana, bali kristo ni yote, na katika yote.

WIMBO WA KATIKATI: Zab.145:2-3,10-13 (K)9
1. Kila siku nitakuhimidi, Nitalisifu jina lako milele na milele. Bwana ndiye mkuu mwenye kusifiwa sana, Wala ukuu wake hautambulikani.

(K) Bwana ni mwema kwa watu wote.

2. Ee Bwana, kazi zako zote zitakushukuru, Na wacha Mungu wako watakuhimidi. Wataunena utukufu wa ufalme wako, Na kuuhadithia uweza wako. (K)

3. Ili kuwajulisha watu matendo yake makuu, Na utukufu wa fahari ya ufalme wake. Ufalme wako ni ufalme wa zamani zote, Na mamlaka yako ni ya vizazi vyote. (K)

SHANGILIO: Zab.119:28,33
Aleluya, aleluya!
Unitie nguvu sawasawa na neno lako,
Ee Bwana, unifundishe njia ya amri zako.
Aleluya!

INJILI: Lk.6:20-26
Yesu aliinua macho yake akawatazama wanafunzi wake, akasema, Heri ninyi mlio maskini, kwa sababu ufalme wa Mungu ni wenu. Heri ninyi mlio na njaa sasa, kwa sababu mtashiba. Heri ninyi mliao sasa, kwa sababu mtacheka. Heri ninyi watu watakapowachukia na kuwatenga, na kuwashutumu, na kulitupa nje jina lenu kama neno ovu, kwa ajili ya Mwana wa Adamu. Furahiwani siku ile na kuruka-ruka, kwa kuwa, tazama, thawabu yenu ni kubwa mbinguni; maana, baba zao waliwatenda manabii vivyo hivyo. Lakini, ole wenu ninyi mlio na mali, kwa kuwa faraja yenu mmekwisha kuipata. Ole wenu ninyi ambao mmeshiba sasa, kwa kuwa mtaona njaa. Ole wenu ninyi mnaocheka sasa, kwa kuwa mtaomboleza na kulia. Ole wenu ninyi watu wote watakapowasifu, kwa kuwa baba zao waliwatenda manabii wa uongo mambo kama hayo.

--------------
Maombi mengine
--------------
MAOMBI
Ndugu wapendwa, kwa kuwa kila kitu kinao wakati wake na mahali pake, tumwombe Mungu aliye asili ya hekima yote.

Kiitikio: Twakuomba utusikie.
1. Ili viongozi wetu wa Kanisa waongezewe ari ya kuihubiri Injili, wakitoa heri na hata ole, ikibidi, ili kuuendeleza unabii wa Mwanao Yesu Kristo. Ee Bwana.

2. Viongozi wetu wa serikali wajibidishe katika kutoa huduma kwa jamii kwa wakati, kwani mambo ya ulimwengu huu yanapita. Ee Bwana.

3. Uwaonye na kuwaangalisha walio na mali, walioshiba na wanaocheka sasa, ili watumie vile walivyonavyo kadiri ya mashauri ya Injili yako. Ee Bwana.

4. Utujalie sisi sote kutorudia maisha ya dhambi; bali tuishi maisha mapya ya ufufuko na tujitenge na maovu yaletayo ghadhabu yako. Ee Bwana.

5. Ndugu zetu marehemu wajaliwe uzima wa milele huko mbinguni. Ee Bwana.

Ee Mungu unayetaka tumfuase Kristo aliye yote katika yote, uyapokee maombi yetu. Kwa njia ya huyo Kristo Bwana wetu. Amina.