SOMO 1: Yoe.3:12-21
Bwana asema hivi: Mataifa na wajihimize, wakapande juu katika bonde la Yehoshafau; maana huko ndiko nitakakoketi niwahukumu mataifa yote yaliyo pande zote. Haya! Utieni mundu, maana mavuno yameiva; njoni, kanyageni; kwa maana shinikizo limejaa, mapipa nayo yanafurika; kwani uovu wao ni mwingi sana. Makutano makubwa, makutano makubwa, wamo katika bonde la kukata maneno! Kwa maana siku ya Bwana i karibu, katika bonde la kukata maneno. Jua na mwezi vimetiwa giza, na nyota zimeacha kuangaza. Naye Bwana atanguruma toka Sayuni, atatoa sauti yake toka Yerusalemu; na mbingu na nchi zitatetemeka; lakini Bwana atakuwa kimbilio la watu wake, na ngome ya wana wa Israeli. Hivyo ndivyo mtakavyojua ya kuwa mimi ndimi Bwana, Mungu wenu, nikaaye Sayuni, mlima wangu mtakatifu; ndipo Yerusalemu utakapokuwa mtakatifu, wala wageni hawatapita tena ndani yake kamwe. Tena itakuwa siku ile, ya kwamba milima itadondoza divai tamu, na vilima vitatiririka maziwa, na vijito vyote vya Yuda vitatoa maji tele; na chemchemi itatokea katika nyumba ya Bwana, na kulinywesha bonde la Shitimu. Misri itakuwa ukiwa, na Edomu itakuwa jangwa tupu, kwa sababu ya dhuluma waliowatenda wana wa Yuda; kwa sababu wamemwaga damu isiyo na hatia katika nchi yao. Bali Yuda atadumu milele, na Yerusalemu tangu kizazi hata kizazi. Nami nitaitakasa damu yao ambayo sijaitakasa; kwa maana Bwana ndiye akaaye Sayuni.

WIMBO WA KATIKATI: Zab.97:1-2,5-6,11-12 (K)12
1. Bwana ametamalaki, nchi na ishangilie, Visiwa vingi na vifurahi. Mawingu na giza vyamzunguka, Haki na hukumu ndio msingi wa kiti chake.

(K) Enyi wenye haki, mfurahieni Bwana.

2. Milima iliyeyuka kama nta mbele za Bwana, Mbele za Bwana wa dunia yote. Mbingu zimetangaza haki yake, Na watu wote wameuona utukufu wake. (K)

3. Nuru imemzukia mwenye haki, Na furaha wanyofu wa moyo. Enyi wenye haki, mmfurahieni Bwana, Na kulishukuru jina lake takatifu. (K)

SHANGILIO: Zab.25:4,5
Aleluya, aleluya!
Ee Bwana, unijulishe njia zako,
unifundishe mapito yako.
Aleluya!

INJILI: Lk.11:27-28
Ikawa, Yesu alipokuwa akisema, mwanamke mmoja katika mkutano alipaza sauti yake, akamwambia Heri tumbo lililokuzaa, na matiti uliyonyonya. Lakini yeye alisema, Afadhali, heri walisikiao neno la Mungu na kulishika.

--------------
Maombi mengine
--------------
MAOMBI
Wapendwa, Mungu ni kimbilio letu na ngome yetu. Walisikiao neno lake na kulishika ndio wenye heri. Tumwombe Mungu kupitia Mama yetu Bikira Maria. tukisema:-

Kiitikio: Twakuomba utusikie.
1. Askofu wetu F. na Mapadre wetu wote wazidi kuwa madhubuti kimwili na kiroho, wapate kuwaimarisha watu wao katika imani na mapendo kwako. Ee Bwana.

2. Uwe pamoja na viongozi wetu wa serikali wanaolisikia neno lako na kulishika; na uwahesabie haki kwa imani, wapate kuwa warithi sawasawa na ahadi yako kwa wakuaminio. Ee Bwana.

3. Watu wote duniani wajaliwe kujiandaa kwa ajili ya siku yako ya hukumu ambayo unaifahamu Wewe tu. Ee Bwana.

4. Uwabariki wazazi wetu na utujalie kuutetea uhai wetu na wa wenzetu, wakubwa kwa wadogo, kama neno lako linavyotuamuru. Ee Bwana.

5. Uwahurumie ndugu zetu marehemu na kuwapa furaha isiyo na mwisho huko mbinguni. Ee Bwana.

Ee Mungu, uliyependa Bikira Maria apewe heri kufuatia matendo makuu ya Mwanao, uyapokee maombi yetu. Kwa njia ya Kristo Bwana wetu. Amina.